MOAÑA 3D

MOAÑA 3D é unha das liñas de acción/intervención do noso proxecto TRANSFORMANDO REALIDADES. 

Trátase dunha iniciativa educativa, interdisciplinar e creativa que pretende concienciar, formar, divulgar e valorizar a paisaxe do noso concello, identificando os seus elementos constitutivos, a diversidade, o valor cultural e o simbólico, a través da virtualización de determinados elementos naturais, culturais, artísticos, etc.

bens arqueolóxicos

elementos etnográficos

esculturas

patrimonio cultural

patrimonio natural

Entendemos que a paisaxe é algo vivo, en constante cambio tanto polo paso do tempo como polas acción que levamos a cabo os humáns e que é necesario estudiar, protexer e divulgar o porqué dos seus elementos para saber cómo actuar sobre o mesmo e desenvolver unha actitude responsable no marco da sustentabilidade.

Para iso buscamos potenciar o traballo en equipo e a iniciativa persoal, coordinando distintos departamentos Economía, Plástica, Xeografía e Historia, Bioloxía, Lengua Castellana, Filosofía, Normalización Lingüística, Lingua Galega, Matemáticas, Orientación e Biblioteca, e combinando tarefas entre todos os niveis educativos da ESO e Bacharelato. 

O noso punto de partida é a investigación sobre os elementos constitutivos da paisaxe de Moaña, no que participa toda a comunidade escolar e local (alumnado, profesorado, pais, veciños, asociacións, Concello de Moaña, e a Consellería de Medio Ambiente e Ordenación do Territorio a través do Instituto de Estudos do Territorio).

Posteriormente, seleccionamos determinados elementos naturais, culturais, artísticos, etc para o seu estudo en profundidade, en función dos nosos recursos, e comenzamos a traballar nas técnicas de virtualización.

Para iso, contactamos con Eloy Martínez Soto, historiador, arqueólogo e experto no campo da virtualización patrimonial en 3D, que nos impartiu no primeiro trimestre, un Obradoiro de Introducción á Fotogrametría Dixital, dirixido ao profesorado e ao alumnado de TIC de 1º bacharelato, co fin de que estes formen posteriormente aos seus compañeiros.

Durante 12 sesións aprendemos a planificar e obter imaxes para un correcto levantamento fotogramétrico, coñecemos o software para crear modelos 3D de precisión e editamos as partes dun modelo 3D mediante o emprego de Blender.

Pero tamén nos topamos con numerosos problemas e dificultades:

- Equipos fotográficos insuficientes, polo que todo o traballo realizouse mediante o uso da cámara dos móbiles dos alumnos.

- Falta de trípodes de brazo longo, que suplimos con imaxinación creando nosos propios trípodes con paus de escoba e cinta illante.

brazo telescópico para poda

- Falta de capacidade dos equipos informáticos do centro para traballar co software de creación de modelos 3D, de alta precisión (Agisoft Photoscan) que nos permitía o seu uso de proba durante 30 días.

- Falta de wifi na aula, o que impediu o uso de programas máis simples para móbiles como 123Dcatch.

- Dificultade de acceso a determinados elementos, xa fóra por distancia, por estar situados en zonas abruptas, etc, que resolvemos a través do visor de Google Maps.

Neste momento estamos a pulír os levantamentos fotogramétricos e nunhas semanas, o alumnado da ESO empezará a elaborar as fichas-dossier correspondentes na materia que corresponda (Sociais, Bioloxía, Arte, Antropoloxía, etc..).

Pronto esperamos ter editados os nosos modelos 3D e comezar a traballar na súa publicación e nas distintas campañas de difusión que xa estamos deseñando.